مفت میں دوبارہ شیڈول کریں

میں نے ایک ہفتے کی چھٹی کے لیے ٹکٹ بک کر لیا۔لیکن اگلی صبح مجھے احساس ہوا کہ میں نے ایسا ہفتہ چن لیا ہے جو بالکل موزوں نہیں تھا۔میں نے غلط وقت کے لیے ٹکٹ بک کر لیا تھا۔

چونکہ میرے پاس فریکوئنٹ فلائر کارڈ تھا اس لیے میں نے سوچا کہ پرواز کو دوبارہ شیڈول کرنا کوئی مسئلہ نہیں ہوگا۔لیکن مجھے اُس وقت حیرت ہوئی جب معلوم ہوا کہ پھر بھی مجھے بڑی فیس ادا کرنی پڑے گی۔مایوسی سے میں نے سوچا کہ پھر اس کارڈ کا فائدہ کیا ہے۔

کیا آپ جانتے ہیں کہ اس کے فوراً بعد میرے ذہن میں کیا خیال آیا۔

ہم اکثر ایمان کے بارے میں سوچتے ہیں۔یہ کہ ایمان ہمیں کتنی طاقت دیتا ہے۔یہ کہ ایمان ہماری مشکلات اور مسائل سے نمٹنے میں ہماری مدد کرتا ہے۔لیکن سچ یہ ہے کہ ہم اس بات پر کافی غور نہیں کرتے کہ ایمان صرف اس حالیہ زندگی کے لیے نہیں ہے۔یہ اس سے کہیں بڑھ کر ہے۔یہ ہماری ابدیت کے بارے میں ہے۔مکاشفہ کی کتاب کے بالکل پہلے صفحے پر یوں لکھا ہے۔

'اور یِسُوعؔ مسِیح کی طرف سے جو سچّا گواہ اور مُردوں میں سے جی اُٹھنے والوں میں پہلوٹھا اور دُنیا کے بادشاہوں پر حاکِم ہے تُمہیں فضل اور اِطمِینان حاصِل ہوتا رہے۔ جو ہم سے مُحبّت رکھتا ہے اور جِس نے اپنے خُون کے وسِیلہ سے ہم کو گُناہوں سے خلاصی بخشی۔ اور ہم کو ایک بادشاہی بھی اور اپنے خُدا اور باپ کے لِئے کاہِن بھی بنا دِیا۔ اُس کا جلال اور سلطنت ابدُالآباد رہے۔ آمِین۔ دیکھو وہ بادِلوں کے ساتھ آنے والا ہے اور ہر ایک آنکھ اُسے دیکھے گی اور جنہوں نے اُسے چھیدا تھا وہ بھی دیکھیں گے اور زمِین پر کے سب قبِیلے اُس کے سبب سے چھاتی پِیٹیں گے۔ بیشک۔ آمِین۔ خُداوند خُدا جو ہے اور جو تھا اور جو آنے والا ہے یعنی قادِرِ مُطلق فرماتا ہے کہ مَیں الفا اور اومیگا ہُوں۔ 'مکاشفہ :1 5-8.

شاید آپ نے پہلے ہی اپنی جنت کا ٹکٹ بک کر لیا ہو۔ آپ نے یسوع کو ہاں کہا ہو اور اپنی زندگی اُسے سونپی ہو۔ لیکن آج یہ بات واضح ہو جاتی ہے کہ آپ کی ہاں شک سے بھری ہوئی ہے۔ ممکن ہے کہ آپ نے کبھی واقعی ہاں کہا ہی نہ ہو بلکہ آپ نے دنیا کی باتوں کو ہاں کہا ہو اور اُن چیزوں کو چُنا ہو جو اُس کو پسند نہیں جو آپ کے لیے مرا۔ آپ آج ہی اسی لمحے دوبارہ شیڈول کر سکتے ہیں۔ کوئی اضافی قیمت نہیں۔ کوئی خرچ نہیں۔

'ہم کو اُس میں اُس کے خُون کے وسِیلہ سے مخلصی یعنی قصُوروں کی مُعافی اُس کے اُس فضل کی دَولت کے مُوافِق حاصِل ہے۔ 'افسسیوں 1: 7.

خدا چاہتا ہے کہ آپ آج اُس کے ساتھ زندگی گزاریں کیونکہ وہ چاہتا ہے کہ آپ ہمیشہ کی ابدیت اُس کے ساتھ گزاریں۔ جب آپ حال میں اُس کے لیے وقت نکالتے ہیں تو وہ آپ کے لیے ابدیت کو تیار کر رہا ہے۔ 

آپ ایک معجزہ ہیں۔

ڈیبورا